Daagbook van de Prins

Nao unne daag rust (oftewel op stap in Kepel) waas ut dan zoewiet, de litste daag. Maar zeker neet de minste: vandaag waas de optocht! 27 opgaves waare d'r. Van individuele tot un aantal groete waages. Ze kwaame allemaol veurbeej wie we same mit de road op de Prinsewage stonge te kiehke. Achteraan leepe de kammereuj, vriendinnen van Josine en os mam en de mooder van Josine. Det heije die litste twieje toch good verborge gehaoje. Sjoen um te zeen allemaol!

Wie idderein veurbeej waas ginge ozze waage auch van start. Wat un minse neave de weeg. We hebben hiel get snoepjes gegojd. Auch ut weer werkte good mit, ut is de ganse optoch druug gebleve en ut waas gelukkig gaar neet kaod. Prima optochtweer dus! Kiehk veur de foto's van deze optocht op deze site en op www.egchel.net 

Nao de optocht ginge we veur de litste kier met z'n allen naor ut Erf veur de priesoehtreiking. Sjoen um te zeen det d'r veul groepe mit ginge. DJ Willie zat de tent gans oppe kop, dit kier mit stum! De stumming zoot d'r weer erg good in. De borden die de kammereuj tiedes de optocht beij zich heije, kwaame nog versjillende kiere veurbeij. 

Nao de priesoehtreiking waas ut helaas tiehd veur Jeugdprins Tim en jeugdprinses Zoe um de carnaval aaf te sloete. As litste werd van allebei hun lievelingsliedje gedreijd. Zoe koos veur Egchels geveul en daonao ginge we nog eine kier in de polonaise op ut liedje Hakke Takke, det heij Tim gekoze!! Wie det aaf waas ginge de steek en ut kroontje aaf...We hope det auch Tim en Zoe unne  onvergeatelike tiehd hebbe gehad. Mer as we naor die snuutjes kiehke zit det wel good!!

Wie we oehteindelik naor Manders ginge veur de officiele aafsloehting waas ut daor volle bak!! Geweldig um te zeen wieveul minse d'r mit os meij zien gegaon. Volges traditie ging ich oppe nek en moch ich alle ballonnen die d'r hinge kapot maake. Daonao werd beij idderein veur de litste kier de steek aafgenome en koste we idderein effe persuunlik bedanke. Ach ich mos d'r toen aan geluive, de mantel ging aaf en de scepter mos ich inleevere. Det veulde toch wel erg kaal...

Op de receptie heij ich van DJ Willie cadeau gekrege det hea auch mit nao Manders zoej gaon en dao verder zoe dreije. Wie ut officiele gedeelte aaf waas ging de muziek dus wer aan en ging ut nog unne hiele tiehd door.

Wea kiehke truuk op unne onvergeatelike tiehd. Van teveure koste we neet bedinke det ut zoe geweldig zoej zien. Wea wille idderein dea met os mit heat gedaon ontzettend bedanke veur deze geweldige vastelaovend. Zonger uch heije we dit neet gehad. Dit nimt neemes os oeit nog aaf. BEDANKT!!!!!!!!

En zonnig ginge we gewoen verder. De kingermiddig! Auch vandaag waas ut Erg weer good bezocht. Wea wiste neet det d'r zoeveel kinger in Egchel woene!! Veural de verlichte dansvloer en confetti waas un groet succes. Ze ware d'r neet vanaaf te kriege. Onger ut genot van ranja en chips hebbe ze zich allemaol hopelik good vermakt. 

Tiedes deze middig waas d'r unne verkleidwedstried. Oeht ilke groep werd d'r unne winnaar oehtgekoze. Auch waas d'r unne algemeine winnaar van alle kinger beijein. Ut waas moeilik keeze, want idderein zoog d'r erg leuk oeht! 

Nao deze verkeezing waas d'r nog un optreeje van neemes minder dan de Sjerpsjutters. Ut leek wel of alle kinger heije geoefend, want ze koste alle nummers gans van boehte. Idderein deej dan auch hiel good mit! Auch nao ut optreeje bleef ut nog lang druk in ut Erf. Op un gegeave moment zien we mit z'n alle naor Manders gegaon. Dao hebbe we nog verder gefiest.

Veurdet de Golden Oldies begos heije we un mis in de kerk. De jeugdprins en prinses, vorst Maurice, veurzitter Ruud en ichzelf mochte un stukske veurleaze. Tussendoor waas d'r muziek van Eg Hel. En nao un muzikale aafsloeting ginge we same nao ut Erf.

Gelukkig heije we auch dit jaor wer un aantal goeje acts op ut programma, zes um precies te zien! Toen de zaal einmaol good gevuld waas, kos de playbakcshow beginnen. Leuk um te zeen wieveul meujte iddereien wer heet gedaon! De jury heij ut dan auch neet gemekkelik...mer oehteindelik kwaam d'r toch unne terechte winnaar, dames gefeliciteerd! 

Nao de playbackshow waas d'r nog un gastoptreeje. Toen ginge de voetjes ech van de vloer en idderein bleef wer lang hange! As aafsloeting zien we nog mit z'n allen beij os thoes werm vleis met brudjes gaon eate. Det ging d'r good in nao zonne aovend: mooder en sjoenmooder bedankt vur ut belkes dreije en kipfilet snieje. Ut waas erg lekker.

Nao de sjoelcarnaval koste we beij Manders unne gooje boom legge veur de Machtsoverdracht. Thei en Nel heije un lekker buffet veur os klaor staon. Um 6 oor ging toen de bus naor ut gemeentehoes in Kepel. In un lange stoet van alle verenigingen van Peel en Maas ginge we richting de Heuf. Dao aangekome mochte alle prinse ut podium op um te vertille waarum we de sleutel mochte kriege. Ondanks de zenuwe lukte ut mich aardig good. Heijonger kint gea nog unne kier leaze wat ich vertilt heb:

Geacht College van B&W,

Bej deze wil ich uch ff vertelle waarum ich de macht wul overneme vur dees daag, of missjien wel langer. Zeen dit mer as un ope sollicitatie. Veural umdet ich dinge wel afmaak en op tiëd doon. Neem mer ut veurbeeld van de windjmeules. Verdere toelichting is dink ich wel overbodig.(overhandigen van sfeerbeeld) Dit wurd dan de neije Egchelse horizon….oftewel ut neije Egchels geveul. En det Egchels geveul heb ich van thoes oeht goot meij gekrege. Ich bin in diverse verenigingen actief en actief geweest. Uiteraard heb ich auch altied mien steentje bijgedrage aan EGOpop. Dit jaor wurd d’r echt geknald in Egchel, mit nemes minder as de enige echte Golden Earring en de Heideroosjes! En de Egchelse horeca hoij ich auch goot meij in stand. Same mit miene vriendegroep Alles kumt goot bringe wae de nuddige eurkes door beij Manders aan de bar. Leiding gaeve is mich auch mit de paplepel ingegote, want ozze pap is al jaore voetbaltrainer in de regio. Komend jaor wir van SV Egchel, mer ich voetbal nou vur de derde helft, dus mich hoof d’r nix mier te liëre. Dan nog ff over de afvalscheiding, waor wae as Egchel fanatiek aan meijdoon. Sjoën toch um ilke zonnignacht of manjigmorge die roëje, gaele en greune bek aan de weeg te zeen staon. Daomit zien wae toch echt un veurbeeld vur de vastelaovend in Peel en Maas? Ich stel veur um die grieze bek wig te hale, óf Egchels oranje te make. As lestste ut LOG, in irste instantie bedoeld as Landbouw Ontwikkelings Gebied werd os in Egchel verteld. Wae dinke dao ongertusse gans angers over: Beij os steit ut LOG nou vur Langzaam Onderhandelend Gemeentewerk. As gae mich oeit hebt zeen crosse, dan bin ich toch wel un stuk sneller! Vandao auch miene spreuk waor ich nou mit wul eindige:

Neet oeht de baan of over de kop, mit dees daag gaon ich veurop! ALAAF!

Nao ut officiele gedeelte zien we nog wies elf oor dao gebleven mit un paar angere vereniginge. Mit un aantal leuke optreejes waas ut nog erg gezellig. 

En op vriedig 17 februari ging ut beginne, carnaval 2012! 's Morgens brachte we un bezeuk aan de Fontein. Dao moste de dansmarietjes optreeje. 's Middigs om kwart euver 1 moste we allemaol verzamele beij basissjoel de Kemp. In unne optoch ginge we naor ut Erf, mit veurop de sjoelprins en prinses in unne cabrio! Dao aangekome deej ilke klas un optreeje. Dit werd beoordeeld door de sjoelprins en prinses, jeugdprins en prinses, ex-prins Rick en michzelf. Alle optreejes ware eave leuk um te zeen! Auch waas d'r un spectaculair optreeje van De hoeskamer. Erg leuk det die auch meij deeje. As litste waas auch Kiehk mer oeht van de partij!

Nao de optreejes hebbe we nog effe un feestje kinnen bouwe. Um half 4 waas ut tiehd veur de kinger um nao hoes te gaon. Wea bedanke de lierkrachte en vrijwilligers veur de organisatie van deze middig!